SIMU
aina ya Blackberry ndio chanzo cha kuwanasa wezi pamoja na baadhi ya
vitu vilivyoporwa katika ajali ya msanii wa filamu na muziki nchini,
Marehemu Hussein Mkieti ‘Sharo Milionea’ eneo la Songa Kibaoni wilayani
Muheza mkoani Tanga.
Kamanda
wa Polisi Mkoa wa Tanga, Constantine Massawe, mapema leo alithibitisha
kupatikana vitu hivyo, baada ya msako mkali uliofanywa na uongozi wa
serikali wilayani Muheza wakishirikiana na Jeshi la Polisi.
Saluti5
ilimnukuu kamanda huyo akisema: " Jeshi la Polisi liliweka mtego na
kutangaza kuinunua simu ya mkononi ya msanii huyo aina ya ‘blackberry’
ndipo moja kati ya wanaodaiwa vibaka waliohusika kwenye tukio hilo,
alipojitokeza na kuipeleka kwa ajili ya kuiuza.
"Wakati
walipofika eneo ambalo walikubaliana, walikabidhi simu hiyo kwa ajili
ya kuikagua, lakini baadaye wezi hao walishtukia mtego huo na kukimbia
huku wakiiacha simu hiyo" alifichua Kamanda huyo.
Alivitaja
vitu ambavyo vimesalimishwa kwa jeshi hilo kuwa ni simu ya mkononi aina
ya blackberry, betri ya gari, tairi la akiba, radio ya gari, begi
ambalo lilikuwa na nguo za marehemu, saa ya mkononi na nguo ambazo
alikuwa amevuliwa na vibaka mara baada ya kutokea ajali hiyo.Chanzo:www.saluti5.com
